Գագիկ Ծառուկյանը` ոչ իշխանական ուժերի միասնական թեկնածո՞ւ

«Հանրահավաքի ժամանակ հանրության պահանջը և պատվերը հետևյալն էր` եկել էին հանրահավաք, իմ հաշվարկով` 25 հազար մարդ կար, իսկ դա նշանակում է, որ այդքան մարդ համաձայն է քեզ հետ միասին խնդիրներ լուծել»,- այսօր լրագրողների հետ զրույցում ասաց ԱԺ ՀԱԿ խմբակցության քարտուղար Արամ Մանուկյանը` պատասխանելով Yerkir.am-ի հարցին` ի՞նչ պատվեր տվեց ընդդիմությանը վերջին հանրահավաքին եկած հանրությունը: Ավելի վաղ Yerkir.am-ի հետ զրույցում Արամ Մանուկյանն ասել էր, որ հանրահավաքի ժամանակ պարզելու են, թե ինչ պատվեր է տալու հանրությունը ընդդիմությանը:

Արամ Մանուկյանի խոսքով` ընդդիմության  ցանկությունն է` ավելի ընդարձակվել և խնդիրները  լուծել ավելի լայն խմբով ու լայն քաղաքական-քաղաքացիական  դաշտով: Հանրահավաքի ժամանակ շատ հստակ էր առաջարկը քաղաքական ու քաղաքացիական խմբերին, այն է`  ձևավորել միասնական ֆորմատ:

«Հիմա մենք կսպասենք, կտեսնենք, թե  ինչպիսին է արձագանքը քաղաքական ուժերի հանդեպ, որից հետո, դրական արձագանքի դեպքում, կշարունակենք այդ ֆորմատով, բացասականի դեպքում` առայժմ չգիտեմ»,- ասաց Արամ Մանուկյանը:

Հարցին` Լևոն Տեր-Պետրոսյանի հայտարարությունը, թե ինչո՞վ է Գագիկ Ծառուկյանը պակաս Իվանիշվիլիից, արդյո՞ք մեսիջ էր այն մասին, որ Գագիկ Ծառուկյանը կարող է դառնալ ընդդիմության առաջնորդ, Արամ Մանուկյանը պատասխանեց, որ բացարձակ  նման մեսիջ չկար Լևոն տեր-Պետրոսյանի ելույթում: Նա նշեց, որ ՀԱԿ առաջնորդի ելույթում քաղաքական ուժերին ուղղված հիմնական մեսիջը   համախմբվելու և համատեղ աշխատելու կոչ էր: