Արմեն Մովսիսյանն ամենահին նախարարն է. հնությունն արգումենտ չեն բերում

ԱԺ նիստում ՀԱԿ խմբակցության քարտուղար Արամ Մանուկյանն այսօր հայտարարեց, որ իր ձեռքում է ջրի վերաբերյալ ուսումնասիրությունների երկրորդ թղթապանակը: «Հետո կլինի թղթապանակ լեզվի, հետո արտագաղթի հետ կապված շարք: Միշտ կռիվ եմ տալու այն կառույցների դեմ, ովքեր իմ երկրի նկատմամբ ոտնձգություն են կատարելու, անկախ անձից ու կառույցից: Էդ առումով ես օպոզիցիա չեմ, այլ իշխանություն եմ: Այսուհետ խնդրում եմ, մարդու հայրանունը ներկայացնելիս մի արտաբերեք ռուսերեն ձևով՝ Ռոբերտ Նիկոլայիչ, ասեք՝ պարոն Նազարյան, շատ սիրուն է հնչում: Ոչ թե նախագան, այլ նախագահը, ոչ թե գույքերը, այլ գույքը և այլն, սա էլ է անկախության արժեք, մանավանդ որ դեռ չենք մտել Մաքսային Միություն»,- ասաց Արամ Մանուկյանը:

Նա նշեց, որ վերջին վեց-յոթ ամսում այնքան ցցուն գործընթացներ են եղել, որ ամեն հաջորդ իրադարձությունը ստվերում է նախորդին: Այդ առումով՝ հիմա պատգամավորին գազի խնդիրը ավելի քիչ է երևում, քան «Որոտան» կասկադի խնդիրը: Արամ Մանուկյանի խոսքով՝ նոյեբերին «Որոտանի» ամբողջ գույքը օտարել են, նախքան վաճառք իրականացնելը. որպես գույք հանձնվել է չորս ջրամբար, որոնք ստրատեգիական հատուկ պաշտպանության ենթակա կարևոր օբյեկտներ են: «Խոսքը չի գնում շկաֆի մասին, ինչպես երեկ այս ամբիոնից ասում էր արդարադատության նախարարը, այլ՝ չորս ստրատեգիական օբյեկտների մասին»,- ասաց պատգամավորը: Նա նաև նշեց, որ երեկ ԱԺ-ում երկու նախարարների՝ արդարադատության և էներգետիկայի, ասածները հակասեցին միմյանց:

Արդարադատության նախարարը ասաց, որ կառավարությունը ոչինչ չի վաճառել, վաճառել է «Որոտան» ՓԲԸ-ն, իսկ Արմեն Մովսիսյանը նշեց, որ քառասուն տարին սահմանային տարիք է, ահա ինչու կառավարությունը որոշեց վաճառել այն:

«Հակասեցին իրար, գոնե իրար հետ պայմանավորվեն, որ մեկ բան ասեն, որ մեկը չասի կառավարությունն է վաճառել, մեկն էլ ասի ՀԷԿ-ն է վաճառել: Ինչպե՞ս կարող է գոյություն ունենալ բաժնետոմս առանց գույքի»,- նկատեց պատգամավորը: Նա նշեց, թե իշխանությունները որպես արգումենտ բերում են «Որոտան»-ի` քառասուն տարվա հնությունը, այնինչ Հայաստանում ավելի հին ձեռնարկություններ կան: Պատգամավորը նաև հարց ուղղեց. «Կառավարության մեջի եղածը կարո՞ղ ենք վաճառել, էժան կտաք, գնող կլինի: Արմեն Մովսիսյանն ամենահին նախարարն ա: Հնությունը արգումենտ չեն բերում»: Նա նաև նշեց, որ եթե «Որոտան»-ի վաճառքի հետևում ուրիշ բան կա, ինչի մասին արդեն կան շշուկներ, թող ասեն, որ կա ինչ-որ խնդիր, որը պահանջում է այս ձևի լուծում:

Նա նաև քննադատեց երեկ ԱԺ-ում արդարադատության նախարարի ու էներգետիկայի նախարարի պահվածքը, որը, ըստ պատգամավորի, հանրապետականների թողտվության արդյունքն է: «Ո՞նց էին իրանց պահում, ո՞նց էր Հրայրի պահվածքը, շատ վատ, շատ վատ: Ոչ մի նախարար հինգ տարի հետո չի լինելու, բայց դուք՝ լավ թե վատ ընտրված եք, չպետք է թույլ տայիք, որ նրանք այդպես խոսեն»,- ասաց Արամ Մանուկյանը: Նա վերջում նշեց, որ չի կարող պահանջել ոչ ՏՄՊՊՀ նախագահ Արտակ Շաբոյանից, ոչ էլ Հանրային ծառայությունները կարգավորող հանձնաժողովի նախագահ Ռոբերտ Նազարյանից, որ նրանք պատասխան ունենան բոլոր հուզող հարցերին, այն պարզ պատճառով, որ ըստ պատգամավորի, երկրում կառույցները ոչինչ չեն կարող անել վերևից եկող հրամանների դեմ:

«Ամեն ինչ ղեկավարվում է մեկ տեղից: Չշփոթեք դեմոկրատական կառույցների հետ, որտեղ կառույցները կարող են իրենց կարծիքը համարձակորեն արտահայտել ու չազատվել պաշտոնից: Քաղաքականությունը մշակվում է ուրիշ տեղ, իրականացվում ուրիշ տեղ»,- ասաց նա: