Մխիթարյանը, Մովսիսյանն ու Բերեզովսկին` տնտեսագիտական համալսարանում

Մարտի 20-ին, Հայաստանի երիտասարդական հիմնադրամի և Հայաստանի պետական տնտեսագիտական համալսարանի ուսանողական խորհրդի նախաձեռնությամբ, ուսանողները հանդիպեցին Հայաստանի ֆուտբոլի ֆեդերացիայի նախագահ Ռուբեն Հայրապետյանի, Հայաստանի ազգային հավաքականի ավագ Ռոման Բերեզովսկու, ֆուտբոլիստներ Հենրիխ Մխիթարյանի և Յուրա Մովսիսյանի հետ:

Հայաստանի ազգային հավաքականի ֆուտբոլիստները հանդիպման ընթացքում պատասխանեցին ուսանողների բազմաբնույթ հարցերին։ Մասնավորապես` ուսանողուհիներից մեկին հետաքրքրում էր՝ արդյոք Յուրա Մովսիսյանը մտադիր չէ՞ ֆուտբոլային ակումբ բացել Գյումրիում։ Ի պատասխան՝ Յուրա Մովսիսյանը նշեց, որ ինքը ցանկություն ունի հետագայում ֆուտբոլային ակումբներ բացել ամբողջ Հայաստանով մեկ, սակայն առայժմ խաղալու ժամանակն է։

Ո՞րն է կյանքում հաջողության գրավականը։ Ըստ Յուրա Մովսիսյանի՝ հաջողության գրավականն ամուր ընտանիքն է, Հենրիխ Մխիթարյանի կարծիքով՝ լավ մարդ լինելը, իսկ Ռոման Բերեզովսկու կարծիքով՝ երկուսը միասին։

Իսկ այն հարցին, թե ո՞վ է այսօր լավագույն հայ ֆուտբոլիստը, և' Հենրիխ Մխիթարյանը, և' Յուրա Մովսիսյանը նշեցին՝ Ռոման Բերեզովսկին։

Ի դեպ, հանդիպման ընթացքում ուսանողուհիներից մեկը ամուսնության առաջարկություն արեց Հենրիխ Մխիթարյանին: