Ֆրանսիացին մեկնում է Ադրբեջան` համերգ տալու, բայց հայտնվում` հայկական գյուղում

Ֆրանսահայ կինոռեժիսոր, դերասան, սցենարիստ եւ պրոդյուսեր Սերժ Ավետիքյանը նոր ֆիլմ է նկարահանում` ֆրանսիացի կատակերգու Ժան Ֆրանսուա Դերեքի առաջարկությամբ:

Yerkir.am-ի հետ զրույցում Ավետիքյանը նշեց, որ կատակերգական ֆիլմ է լինելու, որը մարդկային պարզ հարաբերությունների մասին է լինելու:

«Լուրջ կատակերգություն է լինելու: Մի ֆրանսիացի գնում է Ադրբեջան` համերգ տալու եւ պատահականորեն հայտնվում է հայկական խուլ գյուղերից մեկում, որն Ադրբեջանի սահմանում է գտնվում: Պատկերացրեք` նա հայերեն, բնականաբար, չգիտի, բայց ստիպված է լեզու գտնել տեղացիների հետ, քանի որ այլ հնարավորություն չունի: Ֆիլմի միջոցով ուզում ենք ցույց տալ, որ պետք է փորձել հասկանալ դիմացինի աշխարհը, ներքին աշխարհների մոտեցում լինի: Սա ֆրանսիացու հայացք է` Հայաստանի, Ղարաբաղի, գյուղական ապրելակերպի, մշակույթի հանդեպ»,-ասաց Ավետիքյանը:

Ի դեպ, այժմ ֆիլմի սցենարի երրորդ տարբերակն է մշակվում, քանի որ անընդհատ նորանոր մտքեր են առաջանում, բայց սցենարի վերջնական տարբերակը շուտով պատրաստ կլինի:

Ավետիքյանը մարտին գալու է Հայաստան եւ ի թիվս այլ հարցերի` ֆիլմի հետ կապված մանրամասներ է պարզելու, քանի որ ֆիլմը լինելու է Ֆրանսիայի եւ Հայաստանի համատեղ արտադրություն: