Ֆրանսիացին խախտել է կարանտինը, գնացել Իսպանիա` ծխախոտ գնելու, ու մոլորվել. RTBF

Չնայած կարանտինին` Ֆրանսիայի Պերպինիան քաղաքի բնակիչը գնացել է Իսպանիա` ծխախոտ գնելու, ու մոլորվել. տեղեկացնում է yerkir.am-ը` RTBF-ին հղումով:

Ֆրանսիայի` Իսպանիային սահմանամերձ շրջանների բնակիչներն Իսպանիայից էժան ծխախոտ գնելու սովորություն ունեն: Պերպինիանի բնակիչն էլ որոշել է ոտքով անցնել սահմանը` լեռներով: Հարավային Պիրենեյներ դեպարտամենտի ժանդարմերիան նրան գտել է Պերտուսի բարձունքներում`հյուծված, ցրտից դողացող:

«Երիտասարդին, որ Պերպինիանից հասել էր սահման մեքենայով, հետ էին վերադարձրել սահմանային անցակետից: Նա էլ որոշել էր ոտքով հատել լեռներով անցնող սահմանը»,- պատմել են ժանդարմները` հավելելով, որ նա ընկել էր լեռնային գետակը,  խճճվել մոշի թփուտներում և հետո միայն օգնություն կանչել:

Տղամարդուն տուգանքել են  135 եվրոյով` կարանտինի պայմանները խախտելու համար: