Ավելի լավ, ավելի գրագետ Երևան

Ասում են` ամեն մարդ իր արշինով է չափում դիմացինին: Օրինակ` եթե մեկը մանկամիտ է կամ թերուս, նրան թվում է, թե բոլորն էլ այդպիսին են: Արդեն բավական երկար ժամանակ է` Նոր Նորքի զանգվածների բնակիչները մեծ, լուսառատ թվերով տեղեկացվում են թե որ զանգվածում են գտնվում:

Չգիտենք, թե ում մտքի փայլատակումն է այս հնարքը, բայց, անկասկած, կարելի է ենթադրել, թե ով կարող էր մանկան ժպիտով ուրախանալ այս «հնարքի» համար:  Մնում է մասիվների բնակիչների համար թվանշանների ուսուցում կազմակերպեն, որ առաջին զանգվածի բնակիչը չշփոթվի և տուն գնալիս երկրորդ, երրորդ կամ չորրորդ զանգված չգնա: Ժամանակին Լենինն է ասել` սովորել, սովորել, սովորել, : Չգիտենք էլ` ասե՞լ է, թե՞ ոչ, բայց մեր քաղաքի ղեկավարությունը դա հիմք է ընդունել և որոշել է առաջնորդի պատգամը կյանքի կոչել այս կերպ: Իսկ դրանից հետո արժե մտածել նույնիսկ թեկնածուական թեզ պաշտպանելու մասին: