45 հազար` մեկ օրում անձնագիր ստանալու համար

2014 թ. հունվարի 1-ից նախատեսվում է շրջանառությունից հանել ՀՀ-ում գործող հին անձնագրերը: Դրանք կգործեն մինչև անձնագրում նշված վավերականության ժամկետի ավարտը: Հունվարի 1-ից այն քաղաքացիները, որոնց անձնագրի վավերականության ժամկետը լրացել է, կստանան կենսաչափական անձնագիր՝ ճամփորդելու համար, և նույնականացման քարտ՝ հանրապետության տարածքում օգտագործելու համար:

Այսօր լրագրողների հետ հանդիպման ժամանակ ՀՀ ոստիկանության անձնագրային և վիզաների վարչության պետ, ոստիկանության գնդապետ Նորայր Մուրադխանյանը նշեց, որ կենսաչափական տվյալներով նույնականմացման քարտի պետտուրքը կկազմի 3000, իսկ կենսաչափական անձնագրերինը` 25 հազար դրամ:

Ըստ նրա` նույնականացման քարտի և կենսաչափական անձնագրի տրամադրումն օրենքով նախատեսված է 15 աշխատանքային օրում, սակայն եթե քաղաքացիները ցանկանան կենսաչափական անձնագրեր ձեռք բերել մեկ աշխատանքային օրում, պետք է լրացուցիչ վճարեն 20 հազար դրամ, 2 աշխատանքային օրում ` 10 հազար, 5 աշխատանքային օրում` 5 հազար: Փաստորեն, ստացվում է, որ մեկ օրում կենսաչափական անձնագիր ձեռք բերելու համար քաղաքացին պետք է վճարի 45 հազար դրամ:

Անդրադառնալով նոր համակարգի առավելություններին` ոստիկանության գնդապետը նշեց, որ նույնականացման քարտերն իրենց չափերով ավելի փոքր են և դիմացկուն, բացի այդ` պարունակում են էլեկտրոնային կրիչ (չիպ): Նրա խոսքով` կենսաչափական անձնագրերն ավելի հեշտ են նույնականացվում անձի հետ, ավելի հեշտ են դեսպանատներում տրվում մուտքի արտոնագրեր, էջերի քանակն ավելի շատ է` 40 էջ:

«Եթե նախկինում 1000 դրամ վճարում էին բլանկի համար, 1000 դրամ` լուսանկարի և 10 հազար էլ` վավերականության, հունվարի 1-ից այլևս լուսանկար չեն բերի և դրա համար վճարի, այլ տեղում կլուսանկարվեն, իսկ բոլոր ծառայությունները կմտնեն 25 հազար վճարի մեջ»,- ասաց նա և հավելեց, որ աղքատության նպաստ ստացող ընտըանիքներին և 16 տարին լրացած անձանց, ովքեր մինչ այդ անձնագիր չեն ստացել, նույնականացման քարտերը կտրվեն անվճար: