Դատախազին սպառնալիքներ ուղղած ամբաստանյալը հոգեկան հիվա՞նդ է

Դատախազ Վիգեն Միլիտոնյանի վրա շիշ նետելու, նրան հայհոյելու և սպանության սպառնալիքներ հնչեցնելու փաստերի առթիվ հարուցված քրեական գործում նոր մեղադրող է ներգրավվել` ՀՀ գլխավոր դատախազության հատկապես կարևոր գործերով ավագ դատախազ Երիցյանը:

Այսօր Կենտրոն և Նորք-Մարաշ վարչական շրջանների ընդհանուր իրավասության դատարանում` դատավոր Գագիկ Պողոսյանի նախագահությամբ կայացած հերթական դատական նիստում, ամբաստանյալ Արթուր Պետրոսյանի պաշտպան, փաստաբան Գևորգ Մելքոնյանը հանդես եկավ իր պաշտպանյալի նկատմամբ դատահոգեբանական փորձաքննություն անցկացնելու միջնորդությամբ: Փաստաբանը նշեց, որ նախաքննական մարմինը այս գործը քննելու ընթացքում չէր կարող չնկատել իր պաշտպանյալի մարմնի վրա առկա ինքնավնասման բազմաթիվ հետքերը, որոնք Պետրոսյանն արել է կալանավայրում:

Նա հիշեցրեց, որ Պետրոսյանը նախորդ դատական նիստի ժամանակ ևս փորձել է վնասել իրեն` կտրել պարանոցը: Փաստաբանի խոսքով` նրա մարմնին ինքնավնասման հետևանքով առաջացած սպիների քանակն անհրաժեշտ է դարձնում նման փորձաքննություն անցկացնելը:

Բացի այդ` Մելքոնյանը նշեց, որ հարցում է կատարել «Նուբարաշեն» ՔԿՀ, որտեղից պատասխան է ստացել, որ ամբաստանյալը ներկայումս գտվում է բժիշկների հսկողության տակ, եւ նրանք ախտորոշել են` «անձի էմոցիոնալ անկայուն խանգարում` բարդացված թմրամոլությամբ, քրոնիկ հեպատիտ»:

Փաստաբանն առաջարկեց փորձագետին հարցնել, թե Արթուր Պետրոսյանը նախկինում և ներկայումս հոգեկան հիվանդությամբ տառապե՞լ է, թե՞ ոչ, եթե` այո, ապա` ինչպիսի՞ հիվանդությամբ և երբվանի՞ց, եթե տառապում է, ապա իրեն մեղսագրվող արարքը կատարելու պահին այդ հիվանդությունը զրկե՞լ է նրան իր գործողությունների համար իրեն հաշվի տալու և դրանց ղեկավարելու ունակությունից, Պետրոսյանը մեղսունա՞կ է, սահմանափակ մեղսունա՞կ, թե՞ անմեղսունակ, և եթե Պետրոսյանը անմեղսունակ է, ապա նա բժշկական բնույթի հարկադրանքի միջոցների կարիք ունի՞, թե՞ ոչ, եթե` այո, ապա ինչպիսի՞ հոգեկան վիճակում նա կարող է ներկայանալ դատական նիստին:

Միջնորդությունը քննարկելու համար դատավորը մտել է խորհրդակցական սենյակ:

Նշենք, որ մինչ այս գործը Պետրոսյանի մասնակցությամբ շուրջ 6 քրեական գործ է քննվել: Yerkir.am-ի հետ զրույցում ամբաստանյալի մայրը` տիկին Լալան,  հավաստիացրեց, որ որդու նկատմամբ նախկին գործերով նման փորձաքննության չի անցկացվել, և որ սա առաջին դեպքն է: