ՊՆ-ն ու ոստիկանությունը միացնենք իրար. Վլադիմիր Գասպարյան

Քիչ առաջ Վազգեն Սարգսյանի անվան «Հանրապետական» մարզադաշտում ավարտվեց «Վարչապետի գավաթ» ամենամյա ֆուտբոլային մրցաշարը: Եզրափակիչում մրցում էին ՊՆ-ի եւ ոստիկանության թիմերը:

Խաղի հիմնական եւ լրացուցիչ ժամանակի ընթացքում թիմերից ոչ մեկը գոլ չխփեց եւ միայն 11 մետրանոց հարվածաշարի արդյունքում հաղթող ճանաչվեց ՊՆ-ի թիմը:

Հիշեցնենք, որ ոստիկանապետ Վլադիմիր Գասպարյանը ամեն կերպ ջանում էր, որ մրցաշարի հոբելյանական հինգերորդ տարում հաղթող ճանաչվի ոստիկանության թիմը:

Yerkir.am-ի հետ զրույցում նա չհերքեց մեր ունեցած տեղեկություն, ավելին` հաստատեց, որ ոստիկանության թիմին հանձնարարել է լավ պարապել: Մեր լրագրողի դիտարկմանը, թե անգամ ստիպել է մարզումները տեսանկարահանել եւ իրեն ցույց տալ, ոստիկանապետը շփոթված պատասխանեց. «Հա՞, տե՞նց բան եմ ասել»:

«Բանակն ունի ուժեղ ոստիկանություն, իսկ ոստիկանությունն ունի ուժեղ բանակ, հաղթել ենք մենք»,- ավելացրեց ոստիկանապետը:

Մրցանակաբաշխությունից հետո թիմերը սկսեցին լուսանկարվել իրենց ղեկավարների հետ, ինչը, կարծես, Վլադիմիր Գասպարյանի «սրտով չէր»: «ՊՆ-ն ու ոստիկանությունը միացնենք իրար»,- ասաց նա` նկատի ունենալով միասին լուսանկարվելը: