Այն, ինչ հանդուժվել է 2012-2013թթ., չի հանդուժվելու հիմա. Վլադիմիր Գասպարյան

Ոչ թե մենք ենք պատժում, այլ օրենքն է պատժում: Այն ինչ հանդուժվել է 2012-2013թթ., չի հանդուժվելու հիմա: Այսօր Եռաբլուրում լրագրողների հետ զրույցում ասաց ՀՀ ոստիկանապետ Վլադիմիր Գասպարյանը` մեկնաբանելով օրեր առաջ իր իսկ կողմից արված այն հայտարարությունը, թե «մենք էլ էինք առաջ ծեծում, ջարդում, ստորացնում, բայց հիմա այլևս չենք ծեծում ու ստորացնում, մենք հանդուժում ենք»:

Ոստիկանապետը պարզաբանեց, որ իր հայտարարությամբ նկատի է ունեցել միլիցիայից ոստիկանություն անցումը. «Ամբողջ ընթացքում խոսվել է այն մասին, որ միլիցիան ծեծելով ու ստորացնելով է ցուցմունքներ վերցրել: Նախկինում գուցե այդպես է եղել, բայց հիմա մենք փոխվել ենք»,- ասաց ոստիկանապետը` հավելելով, որ այսօր ոստիկանական համակարգում չկան ծեծողներ ու ջարդողներ:

Ոստիկանապետը, խոսելով ոստիկանական համակարգում կադրային փոփոխությունների մասին, կարևորեց այդ հարցում հասարակության հետ ակտիվ համագործակցությունը: «Եթե ոստիկանն իրեն վատ է պահել, ձեզանից պետք է իմանանք: Պետք է միասին աշխատենք և միմյանց օժանդակենք»,- լրագրողներին դիմելով` ասաց ոստիկանապետը: