50 դրամով այս ի՞նչ պատմություն են ուզում սարքել մեր գլխին. Արտեմ Հարությունյան

Ո՞ւմ համար են կառուցում այսքան խաղատներն ու «ստրիպտիզանոցները». քաղաքս դարձել է խաղատների երկիր: Չնայած եթե դրանք այսքան շատ են, ուրեմն` այնտեղ այցելողներ էլ կան, դե, ուրեմն, կառավարությունը թող այդտեղից գոյացած գումարից էլ հանի տրանսպորտի այդ 50 դրամները. Yerkir.am-ի հետ զրույցում, անդրադառնալով տրանսպորտի սակագնի բարձրացման մասին լուրերին, նշեց գրող, գրականագետ Արտեմ Հարությունյանը:

Ըստ նրա` ճիշտ կլինի տրանսպորտի ուղեվարձը մնա նույնը, մանավանդ սոցիալապես անապահով խավի վրա այս թանկացումն էապես կազդի:

«Ինչպե՞ս են նրանք ապրելու իրենց աշխատավարձով, այսինքն` թշվառավարձով: Երիտասարդների` այսքան երկար պայքարից հետո որքանո՞վ է ճիշտ նորից գրգռել այդ շարժումը: 50 դրամով ի՞նչ պատմություն են ուզում սարքել մեր գլխին, պարզ չէ: 50 դրամը, չեմ կարծում, որ էական ազդեցություն կունենա մեր բյուջեի վրա, եթե բյուջեից այդ գումարը հանեն»,- ասաց Հարությունյանը:

Ըստ գրականագետի` վիթխարի քանակությամբ ոչ պիտանի երթուղայիններ են «ֆռֆռում», եւ ոչ ոք չի մտածում դրանց վիճակը բարելավելու մասին: Հարությունյանը համոզված է` թանկացումը ոչ մի կապ չի ունենալու տրանսպորտի ծառայությունների որակի բարձրացման վրա:

«Մի հատ թող նայեն երթուղայինների վիճակը` քրքրված, իսկ վարորդներն էլ րոպեն մեկ իրենց պնչին կպցնում են ծխախոտը, ծուխը փչում աջ ու ձախ, չի մաքրվում էդ հոտը: Դռները երբեմն երթեւեկության ժամանակ, օ՜, անակնկա՜լ, բացվում են, պատուհանների արանքները «օտվյորտկա» են խրած, որ ներքեւ չիջնեն»,- ասաց Հարությունյանը:

Գրականագետը նշում է, որ վերջին շրջանում թանկանում է մթերքի ողջ տեսականին: Հարությունյանը դժգոհ է նաեւ մթերքի որակից. «7-8 տարվա հնության մթերքը կրկին հանվում է վաճառքի, ո՞վ է հետեւելու այս ամենին, չէ՞ որ մեր փոքրիկներն էլ են դրանցով սնվում: Չէ՛, այս քաոսը պետք է ճնշվի»: