Ռուսաստանը խախտել է միջազգային համաձայնագրերը

«Ռուսաստանը, Ադրբեջանին զանգվածային ոչնչացման զենք վաճառելով, խախտում է միջազգային պայմանգրերը, որոնց համաձայն՝ արգելվում է նման քանակությամբ զենք մատակարարել կոնֆլիկտային տարածաշրջաններ»,-այսօր լրագրողների հետ հանդիպման ժամանակ ասաց ՀՀՇ-ական Հովհաննես Իգիթյանը:

Ըստ բանախոսի՝ Հայաստանը, հաշվի առնելով Ռուսաստանի ռազմական դաշնակից լինելու հանգամանքը, բազմիցս հրաժարվել է մի շարք տնտեսական համաձայնագրերից, որոնք կարող էին հսկայական օգուտ բերել մեր երկրին: «Ուրեմն նույն հիմունքով և Ռուսաստանը պիտի հրաժարվեր իր այդ տնտեսական շահից»,-ասաց բանախոսը:

Ըստ Իգիթյանի՝ մեր դիվանագետները պետք է շահարկեն Արևմուտքի հետ տնտեսական հնարավոր համագործակցության ֆակտորը, այդ դեպում արդեն Ռուսաստանը հաշվի կնստի Հայաստանի հետ, առաջարկելով ավելի արդյունավետ տնտեսական համագործակցություն:

Իսկ ԲՀԿ-ական Վարդան Բոստանջյանը, չնայած նրան, որ Հայաստանի աշխարհաքաղաքական կողմնորոշման հարցում հակված է դեպի Ռուսաստանը, կարծում է, որ Հայաստանը պետք է մշակի այնպիսի ռազմավարություն, որտեղ դոմինանտ կլինեն մեր երկրի շահերը:

Բոստանջյանի այս տեսակետին հակադարձեց Իգիթյանը. խոսելով ներկա իշխանությունների դիվանագիտական կորպուսի անգործության մասին՝ ռազմավարական նշանակության այս խնդիրներին լուծման ուղղությամբ և հավելեց, որ իշխանության դիվանագետները զբաղված են միայն մարտի 1-ի դեպքերը տարբեր միջազգային ատյաններում արդարացնելով: