Երեւանում մեկնարկել են ավագանու ընտրությունները

Երեւանում մեկնարկել են ավագանու ընտրությունները: Ժամը 8-ին բացվել են բոլոր՝ 464 ընտրատեղամասերը: Ընտրություններին մասնակցելու իրավունք ունի 816 457 քաղաքացի:

Ավագանու 65 տեղի եւ Երեւանի քաղաքապետի պաշտոնի համար պայքարում են «Առաքելություն», «Բարգավաճ Հայաստան», «Հայ Ազգային Կոնգրես», «Հայ Յեղափոխական Դաշնակցություն», «Հայաստանի Հանրապետական», «Օրինաց Երկիր», կուսակցությունները եւ «Բարեւ Երեւան» կուսակցությունների դաշինքը:

ՀՀԿ համամասնական ընտրացուցակը գլխավորում է Տարոն Մարգարյանը, ԲՀԿ-ն՝ Վարդան Օսկանյանը, ՀԱԿ-ը՝ Վահագն Խաչատրյանը, ՀՅԴ-ն՝ Արմեն Ռուստամյանը, ՕԵԿ-ը՝ Արմեն Երիցյանը, «Առաքելությունը»՝ Մեսրոպ Առաքելյանը, «Բարեւ Երեւան»-ը՝ Արմեն Մարտիրոսյանը:

Ըստ Երևանի մասին օրենքի՝ եթե ավագանու ընտրությունների արդյունքով ընտրություններին մասնակցող կուսակցություններից մեկը ստանում է ավագանու անդամների տեղերի 50 տոկոսից ավելին, այդ կուսակցության թեկնածուների ցուցակի առաջին հորիզոնականում գտնվող անձը համարվում է ընտրված քաղաքապետ: Հակառակ պարագայում` քաղաքապետն ընտրվում է գաղտնի քվեարկության միջոցով:

Չնայած երեկ լռության օր էր, այնուամենայնիվ, բազում ահազանգեր էին հնչում ընտրակաշառքի մասին:

Հուսանք, որ այս ընտրությունները, գոնե, կլինեն արդար, ազատ եւ թափանցիկ: