Մահացել է ռումինահայ նկարիչ Միկլոշ Յակոբովիչը

Դեկտեմբերի 17-ին Ռումինիայի Օրադեա քաղաքում մահացել է ռումինահայ նկարիչ Միկլոշ Յակոբովիչը:

Նկարիչը ծնվել է 1936թ. օգոստոսի 9-ին Կլուժ-Նապոկա քաղաքում: Տրանսիլվանիայի հին հայերի շառավիղներից էր: Նրա նկարները ցուցադրվել են Ռումինիայում, Չինաստանում, Հունգարիայում, Իտալիայում, Գերմանիայում, Հոլանդիայում, Լեհաստանում, Սլովակիայում, Շվեյցարիայում: 1990-ական թվականներին Յակոբովիչն այցելել է Հայաստան, Արցախ:

Ի դեպ, այս տարի հոկտեմբերին նկարչի անհատական ցուցահանդեսը պետք է բացվեր Հայաստանում` Երևանի Ժամանակակից արվեստի թանգարանում, սակայն նրա ծանր հիվանդության պատճառով այն հետաձգվել էր:

Հայաստանի անկախության 20-ամյակի կապակցությամբ Միկլոշ Յակոբովիչը պարգևատրվել էր ՀՀ սփյուռքի նախարարության «Արշիլ Գորկի» մեդալով: