''Սիրիայի բարեկամները'' ճանաչել են Սիրիական ազգային կոալիցիայի լեգիտիմությունը

Այսպես կոչված` «Սիրիայի բարեկամներ» խումբը ճանաչել է Սիրիական ազգային կոալիցիան որպես Սիրիայի միակ օրինական իշխանություն: Այդ մասին հայտարարվել է Մարոկկոյում խմբի հանդիպման ժամանակ, որին ներկա են եղել 130 երկրների ներկայացուցիչներ, այդ թվում` մոտ 60 նախարար, սիրիական ընդդիմության ու միջազգային կազմակերպությունների ներկայացուցիչներ. հայտնում է France-Presse-ը:

Խմբի առաջին հանդիպումը տեղի է ունեցել 2012-ի փետրվարին Թունիսում: Խմբում ընդգրկված են ինչպես արաբական, այնպես էլ արևմտյան երկրներ, որոնք դեմ են Ասադի վարչակազմին:

«Սիրիայի բարեկամները» իրենց հայտարարության մեջ կրկին պահանջել են Բաշար Ասադի հրաժարականը և ընդգծել, որ նրան չի հաջողվի խուսափել պատժից միջազգային օրենքները խախտելու համար: