Հայերի դահիճը` թուրքական նոր ֆիլմի հերոս

Թուրքիայում ֆիլմ են նկարահանելու հայերի և Պոնտոսի հույների ցեղասպանություններն իրականացնողներից մեկի` կերասունցի (գիրեսունցի) Օսման աղայի մասին. տեղեկացնում է թուրքական «Զաման» պարբերականը:

Կերասունցին պատմության մեջ  հայտնի է Թոփալ Օսման անունով: Նա մինչև 1914 թ. ոչ էական մի ավազակախմբի ղեկավար էր, Հայոց ցեղասպանության գործում ընդգրկվել է Հատուկ կազմակերպության (Teşkilat-ı Mahsusa) ղեկավարների կողմից: Օսմանին  էր հանձնարարվել Սևծովյան շրջանը հայերից մաքրելու գործը: Բանտերից ազատված մարդասպաններից բաղկացած իր ավազակախմբով Թոփալը մասնակցել է Արդվինում և շրջակայքում գործադրվող «տեղահանությանը» և սպանել բազմաթիվ հայերի:

Պոնտոսի հույներին էլ կոտորել է աներևակայելի չարչարանքներով և խոշտանգումներով. 1916-1923 թթ. Պոնտոսում սպանվել է առնվազն 60 հազար հույն: