Մտահոգիչ է, բայց ոչ ողբերգական

Այն, որ Ադրբեջանը դարձել է ՄԱԿ-ի Անվտանգության խորհրդի ոչ մշտական անդամ, քաղաքագետ Երվանդ Բոզոյանի համար մտահոգիչ է: Լրագրողների հետ հանդիպման ժամանակ նա հայտնեց, որ Ադրբեջանն այդ երկու տարիներն օգտագործելու է ՄԱԿ-ի ամբիոնը փչացնելու, ԵԱՀԿ Մինսկի խմբի վրա անուղղակի ճնշումներ գործադրելու համար:

Սակայն, քաղաքագետի հավաստիացմամբ, եղածից մեծ ողբերգություն էլ սարքել պետք չէ, «քանի որ Ադրբեջանի հնարավորությունները սահմանափակ են»: Այս ամենի համատեքստում էլ, հայկական կողմը պետք է ավելի ակտիվ աշխատի:

«Այսօր հայկական դիվանագիտությունը պաշտպանվողական քաղաքականություն է վարում, չունի ռազմավարություն, չունի նպատակների ճանապարհային քարտեզ»,-հայտարարեց քաղաքագետը: