ԺԱՄԱՆԱԿ. ԴԱՀԿ-ը կալանք դրեց "ՀԺ"-ի գույքի եւ հաշիվների վրա

«Հայկական ժամանակ»-ի հրատարակիչ «Դարեսկիզբ» ՍՊԸ-ի տնօրեն Աննա Հակոբյանը երեկ հայտնել է, որ Դատական ակտերի հարկադիր կատարման ծառայությունը օրվա երկրորդ կեսին կալանք է դրել խմբագրության գույքի եւ հաշիվներ վրա, եւ իրենք պատգամավորներ Ռուբեն Հայրապետյանին, Լեւոն Սարգսյանին ու Սամվել Ալեքսանյանին` յուրաքանչյուրին կվճարեն 2 միլիոն 44 հազար դրամ:

Կատարելով դատարանի վճռի մյուս պահանջը` թերթը երեկվա համարի առաջին էջում տպագրել էր «Հայկական ժամանակ»-ի անցած տարվա հոկտեմբերի 14-ի համարում «Ութից յոթը ցուցակում են» վերնագրով հրապարակման հերքումը, որում հրապարակված տեղեկությունները պատգամավորներն իրենց պատվին ու արժանապատվությանը հասցված վիրավորանք էին համարել: