Իսկ մենք մանկապարտեզ կունենանք

Համաշխարհային բանկի «Կրթության որակ և համապատասխանություն» վարկային երկրորդ ծրագրի շրջանակում մարզերում նախակրթարանների հիմնադրման աշխատանքներին ծանոթանալու նպատակով ՀՀ ԿԳ նախարար Արմեն Աշոտյանն այցելել է Արարատի և Վայոց ձորի մարզեր:

Աշոտյանը մասնակցել է Վայոց ձորի մարզի Արենի և սահմանամերձ Մարտիրոս գյուղերի դպրոցներում ստեղծված նախակրթարանների հանդիսավոր բացման արարողություններին: Արենիի նախակրթարանում սովորում է 19, Մարտիրոսի նախկրթարանում` 15 երեխա:

Մինչև 2008 թվականը, ինչպես նշել է նախարարը, հանրապետության ավելի քան 170 համայնքներում մանկապարտեզները չէին գործում, իսկ համայնքների 47 տոկոսում դրանք չկային:

«Հանրապետության 6 մարզերի 125 համայնքներում բացվել են նախակրթարաններ, այդ թվում` 22-ական նախակրթարաններ Արարատում և Վայոց ձորում , 19-ը` Արագածոտնում, 23-ը` Արմավիրում, 21-ը` Գեղարքունիքում և 18-ը` Սյունիքում: Այդ նպատակի համար ծախսվել է 1 մլն դոլար»,- 2010-2011թթ. տարված աշխատանքներն է ամփոփել նախարարը:

Ըստ նրա, դատելով միջանկյալ վերլուծությունից, նախապես պլանավորած 170-ի փոխարեն, ծրագրի ավարտին հանրապետությունում կունենանք 250 նորաբաց նախակրթարան:

«Մեր վերջնական նպատակն է 2015 թ. նախակրթարաններում ապահովել ավագ նախադպրոցական տարիքի` 5-6 տարեկան երեխաների համահանրապետական ընդգրկվածության 90 տոկոսանոց ցուցանիշ»,- նշել է Աշոտյանը: