Ինչու է քաղաքապետը զարմացած

Երեւանի կենտրոնի կառուցապատման անզուսպ ընթացքը կասեցնելը, կարծես, անհնար է դառնում։ Նույնիսկ պետական պատասխանատուների անձնական կարծիքն ու ճաշակն այլեւս դադարել են որեւէ նշանակություն ունենալ։

Եզնիկ Կողբացի 42 հասցեում գտնվող բակում կառուցվում է բարձրահարկ շենք, սակայն հարեւան շենքերի բնակիչները բողոքում են, քանի որ արդյունքում նրանք եւ նրանց երեխաները զրկվելու են բակ ունենալու հնարավորությունից: Բնակիչներից տեղեկացանք, որ իրենք դիմել են քաղաքապետին եւ Կարեն Կարապետյանը անձամբ եկել եւ տեսել է իրավիճակը:

«Քաղաքապետը մի պահ իրեն վատ է զգացել, որ այսպիսի շենք են կառուցում, սակայն մենք զարմացանք, քանի որ կառուցման իրավունքը հենց նա է ստորագրել: Մենք Կարապետյանին առաջարկեցինք բարձրահարկի փոխարեն կառուցել 2 հարկանի սպորտ դահլիճ եւ բակ, որպեսզի երեխաները խաղանալու տարածք ունենան»,- ասում է բնակիչ Վարդան Գերավետյանը:

Քաղաքապետը հանձնարարել է Կենտրոնի թաղապետ Գագիկ Գանջումյանին հանդիպել բնակիչների հետ` համաձայնության եզրեր գտնելու համար: Սակայն հանկարծ պարզվել է, որ Սամվել Մայրապետյանը` կառուցապատողը, քաղաքում չէ:

Սեպտեմբերի 5-ին տեղի է ունեցել բաղձալի հանդիպումը թաղապետի, ճարտարապետ Նարեկ Սարգսյանի եւ բակի ներկայացուցիչների հետ: «Արդյունքում պարզ դարձավ, որ այն, ինչ կատարվում է, համապատասխանում է բոլոր նորմերին եւ անձամբ ճարտարապետը կողմ է դրան»,- ասաց Գերավետյանը:

Նշենք, որ այժմ էլ շարունակվում են կառուցապատման աշխատանքները, որոնք բնակիչների ամեն մի բողոքից հետո, կարծես, նոր թափ են ստանում...