Արձանագրությունների վերադարձը ոչինչ չի նշանակում

ՀՅԴ Հայ դատի եւ քաղաքական հարցերի գրասենյակի պատասխանատու Կիրո Մանոյանը, հաշվի առնելով Ադրբեջանի ոչ կառուցողական կեցվածքը, կանխատեսելի ապագայում Ղարաբաղյան հարցում որեւէ առաջընթաց չի տեսնում: Այդ հանգամանքն էլ դաշնակցական գործչին հիմք է տալիս ենթադրելու, որ առաջընթաց չի կարելի ակնկալել նաեւ Հայաստան-Թուրքիա հարաբերություններում` հակառակ նրան, որ Թուրքիան փորձում է ցույց տալ` իբր հայ-թուրքական արձանագրությունները տակավին պահում է օրակարգում:

Արձանագրությունների վերադարձը Թուրքիայի խորհրդարան, ըստ Կ. Մանոյանի, ոչինչ չի նշանակում, քանի որ այդ արձանագրությունները նախկինում էլ օրակարգում էին, սակայն չէին վավերացվում:

«Իրենք վավերացման ուղղությամբ նույնիսկ նվազագույնը չէին անում, այնինչ անհրաժեշտ էր, որ փաստաթղթերի վավերացումն անպայման ունենար խորհրդարանի համապատասխան հանձնաժողովի տեսակետը: Օրակարգում պահելով` Թուրքիան պարզապես ուզում է ստեղծել տպավորություն, թե իբր կա գործընթաց, իսկ այդ գործընթացը ենթադրում է Հայաստանի վրա այլ պետությունների կողմից ճնշում, որպեսզի մենք մեր ստորագրությունը հետ չվերցնենք»,- նշեց դաշնակցական գործիչը` շեշտելով, որ Թուրքիան արձանագրությունները օրակարգ է վերադարձրել հենց այդ խնդիրը լուծելու համար:

«Պարզ է, որ նրանք ո'չ մտադրություն եւ ո'չ էլ ցանկություն ունեն այդ արձանագրությունները վավերացնել, քանի որ նույնիսկ Հայաստանի այդքան բարյացակամ ու զիջողական կեցվածքի դիմաց Թուրքիան շարունակում է նախապայմաններով խոսել Հայաստանի հետ»,- նշեց նա: