Մեծամասնակա՞ն, թե՞ համամասնական

ԱԺ խորհրդարանական ուժերի տարբեր ներկայացուցիչներ այսօր մասնակցեցին «Մեծամասնակա՞ն, թե՞ համամասնական» թեմայով քննարկմանը:

ՀՀԿ-ական պատգամավոր Հովհաննես Մարգարյանը քննարկումը ժամանակավրեպ համարեց` հաշվի առնելով այն հանգամանքը, որ նոր Ընտրական օրենսգիրքն արդեն ընդունվել է: Ամեն դեպքում հիշեցրեց Հանրապետական կուսակցության տեսակետը` իրենք դեմ են 100 տոկոսանոց համամասնական ընտրակարգին, քանի որ կարծում են, որ մեծամասնական համակարգով ընտրված պատգամավորներն ավելի ակտիվորեն են զբաղվում կոնկրետ ընտրատարածքի խնդիրներով:

ԲՀԿ-ից Նաիրա Զոհրաբյանը հայտարարեց, թե հասարակությանը ոչ թե ընտրությունների` մեծամասնական կամ համամասնական լինելն է հուզում, այլ դրանց արդար ու թափանցիկ անցկացումը: «ԲՀԿ-ն իր ծրագրում, որպես հեռահար նպատակ, ֆիքսել է հարյուր տոկոսանոց համամասնական ընտրակարգը: Կարծում ենք, որ որքան զարգանան եւ բյուրեղացվեն քաղաքական կուսակցությունները մեր երկրում, ի վերջո, հանգրվանը պետք է լինի հարյուր տոկոսանոց համամասնական ընտրակարգը: Բայց մենք հասկանում ենք նաեւ, որ գործ ունենք առկա իրողությունների հետ, եւ այսօր հարյուր տոկոսանոց համամասնական ընտրակարգը կարող է արդարացված չլինել»,- ասաց նա:

«Ժառանգություն» կուսակցության վարչության փոխնախագահ Ռուբեն Հակոբյանը հայտարարեց, որ նորանկախ Հայաստանի պատմության ընթացքում ընդամենը մեկ նորմալ ընտրություն է տեղի ունեցել` 1990 թվականի մայիսին` Խորհրդային օրենսդրության պայմաններում: «Եթե պետության մեջ  չկա քաղաքական կամք, հասարակության մեջ չկա քաղաքական ակտիվություն եւ իշխանությունն իսկապես շահագրգիռ չէ նորմալ ընտրություն անցկացնել, ուրեմն ցանկացած մոդել չի կարող արդյունավետ լինել»,- ասաց նա:

«Ժառանգության» ներկայացուցչի համոզմամբ`  այս պահին մեր պետության համար 100 տոկոսանոց ընտրակարգը պարզապես անհրաժեշտություն է: «Նույնիսկ կուսակցություններ կան, որ այդ մարդկանց անուններն ամաչում են ընդգրկել իրենց համամասնական ցուցակներում, մտածում են, որ կվարկաբեկվեն եւ ուղարկում են մեծամասնական ընտրատարածք»,- հայտարարեց նա:

Իսկ ՀՅԴ պատգմավոր, ՀՅԴ Գերագույն Մարմնի ներկայացուցիչ Արմեն Ռուստամյանը, անդրադառնալով քննարկվող խնդրին, ասաց, որ հարցը էական նշանակություն չունի ժողովրդավար երկրներում: «Այն երկրում, որտեղ ժողովրդավարություն կա, ուզում ես մեծամասնական ընտրություն ունեցի, ուզում ես` համամասնական, ընտրությունները նորմալ են անցնում, եւ արդյունքում ձեւավորված խորհրդարանը լեգիտիմ է լինում: Իսկ Հայաստանում դա էական է, որովհետեւ ժողովրդավարություն չկա»,- հայտարարեց ՀՅԴ պատգամավորը: Նա նշեց, որ ժողովրդավարություն հաստատելու համար առնվազն մեկ ժողովրդավարական ընտրություն պետք է անցկացնել, սակայն 1990 թվականից այս կողմ որեւէ ընտրության արդյունքում իշխանափոխություն չի եղել. իշխանությունները վերարտադրվել են: