ԱՌԱՎՈՏ. Հանգիստ եւ խաղաղ պատրաստվում են

Ի պատասխան նախօրեին ասուլիսում «Ժառանգություն» խմբակցության անդամ Ստեփան Սաֆարյանի արած այն հայտարարությանը, թե առաջիկա ընտրություններում ԲՀԿ-ի հիմնական մրցակիցը լինելու է ՀԱԿ-ը, եւ նրանք միմյանցից են ձայն տանելու, ԲՀԿ խմբակցության պատգամավոր Նաիրա Զոհրաբյանը պատասխանեց. «Ես, իհարկե, կարող եմ հասկանալ տարբեր քաղաքական ուժերի եւ գործիչների հետեւողական հետաքրքությունը ԲՀԿ-ի հանդեպ: Այսուհանդերձ, ընդամենը ուզում եմ նշյալ գործիչներին խորհուրդ տալ այդքան «չանհանգստանալ» ԲՀԿ-ի համար եւ զբաղվել սեփական քաղաքական ուժի խնդիրներով, որոնք վստահաբար բավականին լուրջ են:

Մենք, ի տարբներություն շատերի, հանգիստ եւ խաղաղ պատրաստվում ենք առաջիկա խորհրդարանական ընտրություններին, քանզի միանշանակ վստահ ենք ԲՀԿ-ի քաղաքական կշռի եւ հանրային վստահության վրա, ուստի որևէ մրցակցությունից չենք անհանգստանում: Իսկ եթե ոմանք, այնուամենայնիվ, որոշել են իրենց խնդիրները թողած` ԲՀԿ-ի երկրպագուների ֆան ակումբներ բացել և մեր խնդիրներով զբաղվել` իրենց գործն է: Յուրաքանչյուր ոք ազատ է իր նախապատվությունում»: