ՀԱՅՈՑ ԱՇԽԱՐՀ. Պահանջում են

ԱՄՆ Հայ Դատի հանձնախումբը սկսում է «Դու ինձ ներողություն ես պարտք» արշավը` ուղղված Թուրքիայի վարչապետ Ռեջեբ Էրդողանին` պահանջելով, որպեսզի նա ներողություն խնդրի հայ ժողովրդից: Ինչպես տեղեկացրին հանձնախմբից, նամակներ են ուղարկվել հանձնախմբի հետեւորդներին` խնդրանքով` դրանք ուղղել Թուրքիայի վարչապետին:

Նամակին կցված է այն տեսագրությունը, որում Թուրքիայի վարչապետը եւ Ադրբեջանի նախագահ Իլհամ Ալիեւը հեգնական արտահայտություններ են անում հայ ժողովրդի եւ անձամբ նախագահ Սերժ Սարգսյանի հասցեին: Հենց դրա համար էլ ամերիկահայերը պահանջում են ներողություն խնդրել:

«Թուրքիայի վարչապետը ներողություն է պահանջում Հայաստանի նախագահից, սակայն այս կերպ նա նմանվում է նորվեգացի ահաբեկիչ Անդերս Բրեյվիկին, որը պահանջում է, որ իր զոհերի հարազատներն իրենից ներողություն խնդրեն այն բանի համար, որ պահանջում են նրան պատասխանատվության ենթարկել»,- ասել է հանձնախմբի նախագահ Քեն Խաչիկյանը: