Ոչ մի օտարերկրյա դիտորդ

Օտարերկրյա դիտորդներին թույլ չեն տալու մոնիտորինգ իրականացնել Եգիպտոսում նոյեմբերին կայանալիք խորհրդարանական ընտրությունների ժամանակ. հայտարարել է իշխող Ռազմական խորհրդի անդամ, գեներալ Մամդուհ Շահինը` լրագրողներին ներկայացնելով ընտրությունների մասին նոր օրենքը:

Նա կարծիք է հայտնել, որ «օտարերկրյա դիտորդների ներկայությունը խախտելու է Եգիպտոսի ինքնիշխանությունը», եւ հավելել, որ ընտրությունների վերահսկողությունը կիրականացնի տեղի դատական իշխանությունը. տեղեկացնում է mignews.com-ը:

Եգիպտոսի մի շարք քաղաքական գործիչներ արդեն քննադատել են Ռազմական խորհրդի այդ որոշումը` համարելով, որ Հոսնի Մուբարաքին պաշտոնանկ անելուց հետո առաջին ընտրությունների թափանցիկությունը հարվածի տակ է դրվում: Մարդու իրավունքների ազգային խորհրդի անդամ Հաֆեզ Աբու Սաադը հայտարարել է, որ զինվորականների` «ազնիվ ընտրություններ» անցկացնելու խոստումը բավարար չէ, նաեւ հավելել է, որ նրանք էլ վարում են Մուբարաքի կառավարության քաղաքականությունը: