"Ծեծված թեմա"

Կառավարությանն առընթեր միգրացիայի գործակալության պետը արտագաղթի կտրուկ աճի մեջ մեղադրում է լրատվամիջոցներին, իսկ երկրի վարչապետն այն դարձնում էր հումորի առարկա: Անգամ այս փաստերն են հուշում, թե գործադիր իշխանությունը որքան անլուրջ է վերաբերվում  մարդկանց` անզեն աչքով նկատելի արտահոսքի մասին լրատվամիջոցների, հասարակական-քաղաքական շրջանակների կողմից չդադարող ահազանգերին:

Սակայն բավական էր միայն Ադրբեջանի արտգործնախարարը չարախնդությամբ խոսեր Հայաստանում ստեղծված վիճակի մասին, եւ ահա միգրացիոն խնդիրները դառնում են հանրապետության նախագահի հրավիրած խորհրդակցության թեման: Սա հերթական վկայությունն է այն իրողության, որ իշխանության համար առաջնորդողը ոչ թե սեփական հասարակության կարծիքն է, որը, փաստորեն, մինչ այժմ խնամքով արհամարհվում էր, այլ հարեւան երկրի ինչ-որ չինովնիկի հնչեցրած տեսակետը: Եվ իշխանության գիտակցության մեջ որեւէ խնդիր չի ընկալվում որպես ազգային անվտանգությանն սպառնացող վտանգ այնքան ժամանակ, քանի դեռ այն քննարկման առարկա չի դառնում դրսում:

Անգամ այդ իրավիճակում նախագահը հրահանգում է ոչ թե պարզել առաջացած աժիոտաժի բուն պատճառները եւ լուծումներ գտնել, այլ խնդիրը «ծեծված թեմա» համարելով` ընդամենը հնչող քննադատություններին արձագանքել, այսինքն` պաշտպանվել: