Սեւ ամպեր` Գավառի քաղաքապետի գլխին

Հայաստանի գլխավոր դատախազ Աղվան Հովսեփյանը միջնորդագրով դիմել է վարչապետ Տիգրան Սարգսյանին՝ առաջարկելով քննարկել Գավառի քաղաքապետ Գուրգեն Մարտիրոսյանի հետագա պաշտոնավարման նպատակահարմարության հարցը:

Ըստ past.am-ի ունեցած հավաստի տեղեկությունների` Գուրգեն Մարտիրոսյանի դեմ մեղադրանք է առաջադրվել Հայաստանի քրեական օրենսգրքի 334 հոդվածի առաջին մասով՝  հանցագործությունը պարտակելը (նախատեսվում է տուգանք նվազագույն աշխատավարձի 300-պատիկից մինչեւ 500-պատիկի չափով, 1-3 ամսով կալանք կամ ազատազրկում առավելագույնը երեք տարի ժամկետով):

Քրեական գործի տվյալներով` Գ.Մարտիրոսյանը օգնել է ապօրինի հրազենով սպանության փորձ կատարած իր ազգականներին` եղբայրներ Արամ եւ Արթուր Մարտիրոսյաններին, խուսափել քննությունից եւ փախուստի դիմել:

Հայաստանի անկախության 20-ամյա տարեդարձի կապակցությամբ հայտարարված համաներմամբ Գավառի քաղաքապետի նկատմամբ քրեական հետապնդումը դադարեցվել է, սակայն հարուցված գործը հիմք է դարձել նրա հետագա պաշտոնավարման հարցը քննարկման առարկա դարձնելու համար:

Ըստ տեղեկությունների` քաղաքապետի հովանավորյալ անձինք հայտնաբերվել են, նրանց առաջադրվել է մեղադրանք, եւ գործն արդեն ուղարկվել է դատարան: