Ամուլսարում սպասվածից շատ ոսկի կա

Բրիտանական FoxDavies ընկերությունը հայտարարել է, որ «չափազանց ներշնչված է» Հայաստանում իրականացված վերջին հետախուզական հորատումների արդյունքներից:

Ըստ proactiveinvestors.com.au կայքէջի` հորատումների արդյունքում հայտի է դարձել, որ Ամուլսարի նախագիծը կարող է ընդարձակվել դեպի հարավ-արեւմուտք` դուրս գալով ներկայիս պաշարների սահմաններից:

Հիշեցնենք, որ Ամուլսարը գտնվում է Սյունիքի եւ Վայոց Ձորի մարզերի սահմանում գտնվող տարածքում:

Խոսքն այս դեպքում լրացուցիչ շուրջ 2,5 միլիոն ունցիա ոսկու մասին է: Նշենք նաեւ, որ Ամուլսարի հանքավայրի մասին նախապես ասվում էր, որ այն պարունակում է 1,4 միլիոն ունցիա ոսկի (մոտ 40 տոննա), իսկ ահա յոթ հորատանցքերի ուսումնասիրման արդյունքների ամփոփումը վկայում է, որ առկա է գեոքիմիական անոմալիա, եւ այն տարածվում է ներկայիս շերտից 500 մետր խորության վրա:

Ավելացնենք, որ ներկա պահին Հայաստանի տարածքում շահագործվում է ոսկու 9 հանք: