Կարկտահարություն Գեղարքունիքում /տեսանյութ/

Հուլիսի 5-ի երեկոյան տեղացած խոշոր կարկուտը զգալի վնաս է պատճառել Գեղարքունիքի մարզի Սևանի և Մարտունու տարածաշրջանների որոշ համայնքների:

Սևանում տուժել են ջերմոցային տնտեսությունները, որոնք մարդիկ ստեղծել էին` գյուղատնտեսական վարկերի բեռի տակ մտնելով: Ձվաչափ կարկուտը կոտրել է ջերմոցների ապակիները, ոչնչացրել դրանց պաշտպանության տակ գտնվող բերքը:

Ծովինար և Վարդենիկ համայնքներում էլ կարկտահարվել են ինչպես կարտոֆիլի ցանքատարածքները, այնպես էլ կաղամբի և այլ մշակաբույսերի սածիլները, մրգատու ծառերը: Այս համայնքներում ևս բազմաթիվ հողագործներ հողը մշակելու համար վարկառու էին դարձել, բայց բնական աղետն ի չիք դարձրեց վարկը մարելու ու հավելյալ եկամուտ ստանալու` գյուղացու ակնկալիքը: Տեղի կլիմայական պայմաններում մարդիկ արդեն չեն էլ կարող վնասված մշակաբույսի փոխարեն մեկ ուրիշ բան ցանել:

Վնասի չափերը ճշգրտում են գյուղապետարանների ստեղծած հանձնաժողովները: Իսկ շվարած գյուղացին մտածում է, թե ինչպես է փակելու գյուղվարկը...