ՏԵՍԱՆՅՈՒԹ․ Առաջիկա օրերին լինելու ենք Արցախում, Սյունիքում, Տավուշում և Գեղարքունիքում․ Իշխան Սաղաթելյան

Առաջիկա օրերին լինելու ենք Արցախում, Սյունիքում, այնուհետև Տավուշում և Գեղարքունիքում, այսինքն, Հայաստանի Հանրապետության այն հատվածներում, որտեղ կան անվտանգային հարցեր ու նաև Արցախում՝ ըստ Yerkir.am-ի ասաց ՀՅԴ Հայաստանի ԳՄ ներկայացուցիչ, ԱԺ փոխնախագահ, ԱԺ «Հայաստան» խմբակցության պատգամավոր Իշխան Սաղաթելյանը ԱԺ-ում՝ լրագրողների հետ ճեպազրույցում։

Նա վստահեցրեց, որ իշխանությունները, երբ ասում են՝ ընդդիմության ակտիվությունը վտանգում է Արցախը, դրանով ընդամենը արդարացնում են իրենց անգործությունը․ «Արցախը վտանգել են և շարունակում են վտանգել իրենք՝ իրենց գործունեությամբ»։

Իշխան Սաղաթելյանի համար ակնհայտ է, որ օրվա իշխանությունը երկիրը փորձում է տանել նոր կապիտուլյացիայի։

«Իրենց այս վարքագիծը հիմնավորելու համար փորձում են նման գռեհիկ, անմիտ ելույթներ ունենալ՝ հերթական անգամ մեր ժողովրդին խաբելով, մոլորեցնելով և Ալիևով վախեցնելով։ Պրոցեսները շատ արագ են տեղի ունենում․ Բրյուսելյան վերջին հանդիպումը ևս դրա վկայությունն է»,-ասաց նա։

Իշխան Սաղաթելյանն ընդգծեց, որ իրենք գտնում են, որ Հայաստանի թիվ 1 օրակարգը Արցախն է և Հայաստանի Հանրապետության անվտանգությունը, այս պատճառով էլ այս պահին ԱԺ-ում քննարկել մեր երկրի կենսական շահերի հետ անմիջական առնչություն չունեցող հարցեր՝ իրենք նպատակահարմար չեն գտնում։

«Այդ պատճառով խորհրդարանական երկու ընդդիմադիր խմբակցությունները որոշել են այս քառօրյային չմասնակցել»,-նշեց Իշխան Սաղաթելյանը։

Մանրամասն՝ տեսանյութում․