Բանակցություններին ԼՂՀ-ի չմասնակցելը կարգավորման խոչընդոտներից մեկն է

Հաշվի առնելով Ղարաբաղյան հակամարտության կողմերի դիրքորոշումները` հիմնարար սկզբունքների և, ընդհանրապես, փոխզիջումային լուծման վերաբերյալ համաձայնության գալը ծայրաստիճան դժվար կլինի. «Երկիր»-ի հետ զրույցում ասաց ԼՂՀ արտաքին քաղաքականության եւ անվտանգության հանրային խորհրդի նախագահ, ԼՂՀ նախկին արտգործնախարար Մասիս Մայիլյանը:

«Դրա համար չկան օբյեկտիվ նախադրյալներ: Ներկա պայմաններում, այսպես կոչված` հիմնարար սկզբունքները կարող են ստորագրվել միջազգային ուժեղ ճնշման տակ, ինչը կարող է հակամարտող կողմերի հասարակություններում ներքին ապակայունացման հանգեցնել»,- նշեց նա:

Մ. Մայիլյանի կարծիքով` բանակցություններին ԼՂՀ ներկայացուցիչների չմասնակցելը կարգավորման խոչընդոտներից մեկն է: Ոչ պակաս լուրջ խոչընդոտ է ԵԱՀԿ Մինսկի խմբի համանախագահող երկրների մոտեցումը. նրանք փորձում են Ղարաբաղի օրինակով ապացուցել Հելսինկյան հնացած սկզբունքների կենսունակությունը, սկզբունքներ, որոնք միջնորդ երկրներն իրենք են բազմիցս շրջանցել: Այսօր արդեն կան նոր նախադեպեր եւ միջազգային-իրավական նոր իրողություններ, որոնք կարելի է կիրառել Ղարաբաղյան հակամարտության կարգավորման համար:

Ինչ վերաբերում է ԵԱՀԿ ՄԽ համանախագահների` Բաքվից Ստեփանակերտ այցելելիս արդեն երկրորդ անգամ ադրբեջանա-ղարաբաղյան սահմանը ոտքով հատելուն` թե իբր սահմաններ չկան, ըստ Մ. Մայիլյանի, դրանք ոչ մի կերպ չեն ազդում հրադադարի ռեժիմի պահպանման վրա:

«Փիար-ակցիա հիշեցնող այդ ոչ պետքական անցումների փոխարեն միջազգային միջնորդները պետք է հասնեն նրան, որ Ադրբեջանը հրաժարվի ռազմական շանտաժից եւ շահագրգիռ մասնակցություն ցուցաբերի զինված ուժերի շփման գծում տեղի ունեցող միջադեպերի հետաքննությանը: Այս հարցերում ԼՂՀ եւ ՀՀ իշխանությունները պետք է հաստատակամություն ցուցաբերեն եւ չվախենան մերժել համանախագահների՝ դեռեւս չբարեկարգված-չսարքավորված միջպետական սահմանները հատելու մասին դիմումները»,- նշեց նա: