ՀԱԿ-ը իմիտացիա է անում

ԱԺ «Ժառանգություն» խմբակցության ղեկավար Ստյոպա Սաֆարյանի կարծիքով` ՀԱԿ-ի` արտահերթ ընտրությունների պահանջն այս փուլում պարզապես իմիտացիա է` ցույց տալու համար, որ օրակարգում այդ խնդիրները կան: Եվ հենց դա է պատճառը, որ երեք խնդիրների «կիսատ-պռատ» լուծումներից հետո ՀԱԿ-ը պատվիրակություն է ձեւավորում եւ խոսում արտահերթ ընտրությունների մասին:

«Գարնան ընթացքում` շատ կարեւորագույն քաղաքական պահերի, ՀԱԿ-ը ցույց տվեց, որ նախ` իրեն չի մտահոգում իշխանության վերարտադրության բացահայտ դրսեւորումը, եւ ինքը որեւէ ռեակցիա ցույց չի տալիս: Հաջորդ ընտրություններում ՀԱԿ-ը առնվազն մրցակից չի լինելու եւ խնդիր չի հարուցելու այդ առումով: Երկրորդ` երբ «Ժառանգության» արտահերթ ընտրության պահանջին ի պատասխան` ՀԱԿ-ը հայտարարեց, թե իր օրակարգում դա չկա»,- ասաց պատգամավորը:

Նա տարօրինակ է համարում, որ ստորագրված կոալիցիոն հուշագրին Լեւոն Տեր-Պետրոսյանն իր որեւէ ելույթում չանդրադարձավ եւ չարձագանքեց: Այսինքն` ՀԱԿ-ն ընդունում է, որ Սերժ Սարգսյանը պետք է լինի հաջորդ նախագահը եւ պետք է ինքն իրեն վերարտադրի: