Orange-ն էլ է մտածում հայկական հեռուստաընկերությունների պես

Կարելի է կարծել, որ Orange-ը հայաստանյան շուկայում հաստատվելուց հետո լավ ուսումնասիրել է հայերիս մենթալիտետը և իր գովազդները պատվիրում է` ըստ այդ ուսումնասիրությունների:

Սակայն դիտելով նույն նախագծի հայաստանյան և ֆրանսիական գովազդային տարբերակները հանգում ես այն եզրակացության, որ Orange-ն էլ մեզ` հայերիս, մոտենում է այնպես, ինչպես մեր «առաջատար հեռուստաընկերությունները», այսինքն` ոչ թե գովազդում է բարձրարժեքը կամ հաճելին, այլ թելադրում է` «ինչպես ապրել»:

Դիտելով հայկական որոշ հեռուստաընկերությունների սերիալները` հասկանում ես, որ պետական մակարդակով և աջակցությամբ քարոզվում է անբարո կյանքը, կրիմինալը, բազմակնությունը կամ … մի խոսքով այն ամենը, որոնք անկախության շրջանում դեռևս, բարեբախտաբար, չեն արմատավորվել մեր հասարակության մեջ:

Orange-ն էլ է ընտրել այդ ճանապարհը: Իր  «Կինոթատրոն» նախագծում մեզ` հայերիս, առաջարկում է ոչ թե կինոթատրոն գնալ` ֆիլմ նայելու, այլ գրկախառնվելու և միմյանց «վայելելու»: Ոմանք ասում են` Orange-ի գովազդներն արվում են` հաշվի առնելով տարբեր ազգերի, շուկաների և հաճախորդների ճաշակները: Եթե այդպես է, ապա հասել ենք այն այլասերվածության գագաթնակետին, որին հեռուստատեսությունների օրհնությամբ «ձգտում ենք»:

Համեմատելու համար ներկայացնում ենք Orange-ի «Կինոթատրոն» գովազդի հայկական և ֆրանսիական տարբերակները: