ՀԱՅԿԱԿԱՆ ԺԱՄԱՆԱԿ. Դատապարտեցին

Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մնացական Մարտիրոսյանի դատավճռով` «Կոշիկի քաղաք» ՍՊԸ-ի սեփականատեր Արա Կարապետյանը դատապարտվել է 15 տարվա ազատազրկման:

Գործարար Արա Կարապետյանը մեղադրվում է ՀՀ մաքսային կոմիտեի նախկին նախագահ Արմեն Ավետիսյանի տան վրա ավազակային հարձակում կազմակերպելու մեջ:

Մնացական Մարտիրոսյանի` նույն գործով արձակած երեկվա դատավճռով  15 տարվա ազատազրկման է դատապարտվել նաեւ Նոր Նորքի ոստիկանության բաժնի պետի տեղակալ Արմեն Նիկողոսյանը, իսկ գործով անցնող մյուս 8 ամբաստանյալները դատապարտվել են 8.5-ից մինչեւ 14 տարվա ազատազրկման:

Արա Կարապետյանը դատավճռի հրապարակումից հետո կրկին հայտարարել է, որ ինքն ավազակային հարձակման հետ կապ չունի եւ հանցանք չի գործել:

Նա նաեւ հայտարարել է, որ առաջիկայում լրագրողներին տվյալներ կտրամադրի այս գործով իրականությունը թաքցնելու համար կաշառք տվողների եւ կաշառակերների մասին, ինչպես նաեւ կբացահայտի որոշ օլիգարխների հանցագործ կերպարը: