Կաթողիկոսը Վրաստանում կբարձրացնի հայկական եկեղեցիների հարցը

Վրացահայերն անհամբերությամբ են սպասում Ն.Ս.Օ.Տ.Տ. Գարեգին Բ. կաթողիկոսի` մայիսին Վրաստան կատարելիք այցելությանը:

Օրեր առաջ «Երկիր»-ի հետ զրույցում  թբիլիսահայերից մի քանիսն ասել էին, որ ակնկալում են, թե կաթողիկոսի այցի ընթացքում, ի վերջո, լուծում կտրվի հայկական եկեղեցիների հարցին:

«Գոնե Նորաշենի հարցը լուծվի եւ մեզ վերադարձվի, թե չէ ամեն անգամ վրաց հոգեւորականներն ինչ-որ պատմություններ են հորինում` Նորաշենի հետ կապված»,- հույս հայտնեց թբիլիսաբնակ Գայանեն:

Ինչպես «Երկիր»-ին տեղեկացրին Մայր Աթոռ Ս. Էջմիածնի տեղեկատվական համակարգից, Թբիլիսիի Ս. Նորաշեն եկեղեցու հարցը Վրաստան այցելության ժամանակ Գարեգին Բ. կաթողիկոսն անպայման կբարձրացնի:

«Բարձրացվելու են բոլոր խնդիրները, այդ թվում` նաեւ հայկական եկեղեցիների եւ Ս. Նորաշենի հարցը, որոնք անհրաժեշտ են քաղաքական տեսանկյունից»,- ասաց Մայր Աթոռի տեղեկատվական համակարգի ղեկավար Տեր Վահրամ քահանա Մելիքյանը:

Հարցին, թե ինչո՞ւ Վեհափառ հայրապետը չի պատրաստվում այցելել Ախալցխայի Ս. Նշան եկեղեցի, Տեր Վահրամը պատասխանեց, որ այցելության ժամանակացույցն արդեն կազմված է, եւ այս պահին ինքը չի կարող ասել չայցելելու պատճառները: