Համագործակցությունն ակնհայտ է

Իշխանությունների եւ ՀԱԿ-ի միջեւ համագործակցություն չկա, իսկ նման լուրերն անհիմն են, քանի որ «երկխոսության մասին հայտարարություն չկա». հավաստիացնում է ՀՀԿ պատգամավոր Մանվել Բադեյանը:

ՀՅԴ խմբակցության պատգամավոր Լիլիթ Գալստյանը, սակայն, կարծում է, որ համագործակցությունն ակնհայտ է` թեպետ այդ մասին չի բարձրաձայնվում:

«Պայմանավորվածությունն ակնհայտ է, եւ անպայման չէ, որ այն ի ցույց դրվի։ Սակայն ցավալի է, որ իշխանության եւ արտախորհրդարանական ընդդիմության միջեւ երկխոսությունը միտված է ոչ թե պետության կամ պետականության շահերին, այլ զուտ իշխանությունը պահելու եւ վերաձեւելու առաքելություն ունի»,- նշեց ՀՅԴ պատգամավորը։

Անդրադառնալով Մարտի 1-ի իրադարձությունների բացահայտմանը նոր թափ հաղորդելու փաստին` Մանվել Բադեյանը նշեց, որ դա պետք չէ կապել  պայմանավորվածությունների հետ, իսկ նախագահը միջամտել է, քանի որ իրավապահ մարմիններն իրենց գործառույթը չեն կատարել:

Իսկ Լիլիթ Գալստյանի կարծիքով` այդ բոլոր գործողությունների եւ հայտարարությունների հիմքում իշխանությունը  պահելու և քաղաքական դաշտը վերաձևելու խնդիր կա։ «Ես երանի կտայի, որ այս բոլոր  գործողությունների առանցքը լինի ազգային և պետական շահը, բայց ձեռագիրը միայն և միայն  հուշում է, որ  դրանք իշխանությունը ամեն գնով պահելուն, տնտեսական և քաղաքական լծակները վերադասավորելուն ուղղված կոսմետիկ գործողություններ են»,- ասաց նա: