Սիրիայի հարցով Ֆրանսիայի հետ համագործակցությունն ավարտվեց` դեռևս չսկսված. Պուտին

Ռուսաստանը  պատրաստ է ահաբեկչության դեմ պայքարի հարցում համագործակցել միջազգային հանրության հետ, սակայն թե ինչո՞ւ այդ համագործակցությունը չի ստացվում, պետք է հարցնել Եվրոպային: Այդ մասին ՌԴ նախագահ Վլադիմիր Պուտինը ասել է Figaro պարբերականին տված հարցազրույցում. հայտնում է РИА Новости-ն:

«Ես այդ մասին ասել եմ դեռևս ՄԱԿ-ի 70-ամյակին նվիրված ելույթում: Ես  ՄԱԿ-ի ամբիոնից կոչ եմ արել միավորել բոլոր երկրների ջանքերն ահաբեկչության դեմ պայքարում: Բայց դա շատ բարդ գործընթաց է»,- ասել է նա:

Պուտինը հիշեցրել է, որ Փարիզում տեղի ունեցած ահաբեկչությունից հետո Ռուսաստան էր եկել Ֆրանսիայի նախկին նախագահ Ֆրանսուա Օլանդը: «Մենք նրա հետ պայմանավորվեցինք հստակ գործողությունների վերաբերյալ: Սիրիայի ափերին մոտեցավ «Շառլ դը Գոլ» ավիակիրը: Հետո Ֆրանսուան մեկնեց Վաշինգտոն, և վերջ. «Շառլ դը Գոլ»-ը հետ շրջվեց ու գնաց: Իրական համագործակցությունը Ֆրանսիայի հետ ավարտվեց` դեռևս չսկսված»,- մանրամասնել է նա: