Պուտինը ակնարկներ է անում

Երեկ ՌԴ վարչապետ Վլադիմիր Պուտինը պառլամենտականներին հայտարարել է, որ մտադիր է հաջորդ տարի վերադառնալ նախագահական պաշտոնին, քանի որ  երկիրը կարիք ունի «խիստ եւ խաղաղ» տասնամյակի, որի արդյունքում  միայն կգրանցվի տնտեսական աճ:

Նա նախազգուշացումով է հանդես եկել ընդդեմ «ոչ պիտանի անօգուտ  լիբերալիզմի», ինչը, շատերի կարծիքով, խիստ հարված է գործող նախագահ Դմիտրի Մեդվեդեւին:

2 ժամ տեւողությամբ իր ելույթում Պուտինը մանրամասն խոսել է նախկին ձեռքբերումների եւ ապագա պլանների մասին, ինչը նախընտրական քարոզարշավի տպավորություն էր ստեղծում: Նա ասել է նաեւ, որ 30 միլիարդ ֆունտ ստեռլինգ կներդրվի` երկրում ծնելիության և կյանքի տևողության աճ ապահովելու համար:

 Պուտինի ելույթը հաճախ ընդհատվում էր իր ղեկավարած Միավորված Ռուսաստան կուսակցության անդամ-պատգամավորների ծափահարություններով, որոնք խորհրդարանում մեծամասնություն են կազմում: Նման ընդունելությունը նշանակում է, որ իրենք ցանկանում են Պուտինին տեսնել Մեդվեդեւի տեղում:

Եթե Պուտինը նախագահ դառնա, նա կղեկավարի երկիրը մինչ 2024 թվականը: