ԺՈՂՈՎՈՒՐԴ. Դատախազությունը թշնամություն չունի

Ոստիկանության դահլիճում երեկ կայացած ոստիկանության օրվան նվիրված հանդիսավոր նիստը իրենց ներկայությամբ պատվել էին վարչապետ Տիգրան Սարգսյանը, Արթուր Բաղդասարյանը, Արմեն Երիցյանը, Գորիկ Հակոբյանը, Յուրի Խաչատուրովը եւ գլխավոր դատախազի երկու տեղակալները` Մնացական Սարգսյանն ու Արմեն Դանիելյանը:

Չնայած միայն գլխավոր դատախազությունը չէ, որ երկրորդ դեմքով էր ներկայացված, այնուամենայնիվ, բոլորի մոտ հարց առաջացավ, թե որտեղ է Աղվան Հովսեփյանը:

Պարզվեց, որ նա գեներալ Իսագուլեւի որդու մահվան առիթով մեկնել էր ԼՂ:

Գլխավոր դատախազի նկատմամբ հետաքրքրությունը մեծ էր, որովհետեւ օր ու մեջ ոստիկանության աշխատակիցների է ձերբակալում: Այս առիթով զրուցեցինք ՀՀ գլխավոր դատախազի տեղակալ Արմեն Դանիելյանը հետ:

- Պարոն Դանիելյան, ՀՀ գլխավոր դատախազությունն ինչո՞ւ է թշնամություն անում ոստիկանության հետ:

- Բացարձակ նման բան չի կարող լինել:

- Բայց այդքան ոստիկաններ են ձերբակալվում, որի արդյունքում ոստիկանությունը վարկաբեկվում է:

- Ես` որպես գլխավոր դատախազի տեղակալ, չեմ լսել մի ոստիկանի, որ նման հայտարարությամբ հանդես գա: Մենք աշխատանքի վայրում աշխատանքային հարաբերություններ ունենք, գործնական հարաբերություններ, իսկ դրսում` նաեւ ընկերական: Այնպես որ կարծում են` ճիշտ չեն այդ որակումները:

- Այդ դեպքում այդքան ձերբակալություններից հետո հոգեբանական ի՞նչ վիճակով պիտի ոստիկանները մասնագիտական տոն նշեն:

- Ես ոստիկան չեմ աշխատել եւ հոգեբանության առումով չեմ կարող ճշգրիտ պատասխանել: Այդուհանդերձ, եթե կա իրավախախտում, պիտի լինի պատասխանատվություն` լինի դա ոստիկան, թե դատախազ կամ մեկ այլ ուժային կառույցի աշխատակից: Նրանք պետք է լինեն օրինապաշտ եւ պատասխանատվության չեն ենթարկվի: Ուզում եմ ասել, որ ոստիկանները, հատկապես` իրավախախտումների դեմ պայքարում, առաջին գծում գտնվող մարտիկներն են: Հնարավոր է` նաեւ աշխատանքում թերություններ լինեն: Ուզում եմ, որ թերությունները լինեն շատ քիչ, իսկ ձեռքբերումները` շատ: