Անցումային ազգային խորհուրդը ճանաչվել է Լիբիայի օրինական ներկայացուցիչ

Միջազգային կոնտակտային խումբը երեկ Քաթարի մայրաքաղաք Դոհայում Անցումային ազգային խորհուրդը ճանաչել է Լիբիայի ժողովրդի օրինական ներկայացուցիչ:

Ամփոփիչ փաստաթղթում նշված է, որ «Մուամար Քադաֆիի վարչակարգը կորցրել է լիգիտիմությունը», այդ պատճառով նա պետք է հրաժարվի իշխանությունից ` ճանապարհ բացելով համապարփակ քաղաքական գործընթացի համար, որը հնարավորություն կտա Լիբիայի ժողովրդին որոշելու իր ապագան:

«Քադաֆին պետք է դադարեցնի կրակը, զորքերը դորս բերի գրավյալ քաղաքներից եւ անհապաղ վերջ դնի խաղաղ բնակչության նկատմամբ բռնություններին»,- որոշել են Դոհայի հանդիպման մասնակիցները:

Փաստաթղթում նաեւ նշվում է, որ արեւմտյան կոալիցիան շարունակելու է օդային գործողությունները` ուղղված Քադաֆիի զորքերից խաղաղ բնակչության պաշտպանությանը, նաեւ որոշվել է ստեղծել, այսպես կոչված, «ժամանակավոր ֆինանսական մեխանիզմ»` Բենգազիի ընդդիմադիր վարչակազմին օգնելու համար: Ինչպես պարզաբանել է Մեծ Բրիտանիայի արտգործնախարար Ուիլյամ Հեյգը, լիբիացի ընդդիմադիրներին օգնելու են վճարել իրենց վերահսկողության տակ գտնվող տարածքների պետսեկտորի ծախսերը: