Եվրոպան Լիբիայի ազգային խորհուրդը ճանաչել է որպես օրինական կառավարություն

Եվրախորհրդարանը ընդունել է բանաձեւ, որը կոչ է անում Բենգազիում հիմնավորված Լիբիայի անցումային ազգային խորհուրդը ճանաչել երկրի օրինական կառավարություն: Բանաձեւի օգտին քվեարկել է 584 պատգամավոր, դեմ՝ 18-ը, եւս 18 խորհրդարանական ձեռնպահ են մնացել:

Բանաձեւում անդրադարձ կա նաեւ Լիբիայի օդային տարածքը թռիչքների համար փակելու հարցին: Պատգամավորները կոչ են անում Եվրամիության կառավարություններին եւ արտաքին գործերի հարցերով եվրահանձնակատար Քեթրին Էշթոնին՝ պատրաստ լինել սույն միջոցառումը կյանքի կոչելուն:

Միաժամանակ, խորհրդարանականներն ընդգծում են, որ նման գործողությունները կարող են ձեռնարկվել միայն ՄԱԿ-ի Անվտանգության խորհրդի հրամանով: