Վարչապետը խորհուրդ է տալիս հանգիստ վերաբերվել (տեսանյութ)

Այսօր ԱԺ-կառավարություն հարցուպատասխանից հետո ՀՀ վարչապետ Տիգրան Սարգսյանն անդրադարձավ վերջերս մամուլում շրջանառվող` իր հրաժարականի մասին լուրերին: Նա խորհուրդ տվեց հանգիստ վերաբերվել դրանց, քանի որ նման խոսակցություններ իր բոլոր նախորդների մասին էլ եղել են:

Վարչապետն անդրադարձավ նաեւ մեծ աղմուկի պատճառ դարձած` գյուղացիներին կով կթել սովորեցնելու պատմությանը: «Ես այդպիսի հայտարարություն չեմ արել, այդպես ներկայացվեց որոշ լրատվամիջոցների կողմից: Այդ հանդիպմանը մասնակցում էին Համաշխարհային բանկի փորձագետները, որոնք այդ նյութը ներկայացրին մեր դատին, եւ ես ընդամենը մասնագետների այդ կարծիքն ուղղեցի դահլիճում նստած գյուղացիներին»,- պարզաբանեց Տիգրան Սարգսյանը` մեկնաբանությունները վերագրելով գարնանային տրամադրություններին:

Մեկնաբանելով լրատվամիջոցների տարածած տեղեկություններն այն մասին, թե Հայաստանի նախագահը կառավարությանը մինչև մայիս ժամանակ է տվել երկրի քաղաքացիների կյանքի բարելավման համար լուրջ քայլեր իրագործելու համար, Սարգսյանն ասաց, որ ոչ ոք, այդ թվում` նախագահը կառավարության առջեւ ոչ մի վերջնաժամկետ չի դրել:

«ՀՀ նախագահը կարճաժամկետ, միջնաժամկետ և երկարաժամկետ խնդիրներ է ձևակերպել և ներկայացրել»,- ասաց վարչապետը` երկրի սոցիալ-տնտեսական իրավիճակը դարձյալ պատճառաբանելով հետճգնաժամային իրավիճակում  գտնվելու հանգամանքով:

Տեսանյութը կարող եք դիտել այստեղ: