Հիմա էլ Սիրիա՞ն

Սիրիայի հարավում գտնվող Դերաա քաղաքում կազմակերպված բողոքի ցույցը ցրվել է անվտանգության ուժերի կողմից, հրաձգության արդյունքում երեք ցուցարար է սպանվել, ըստ որոշ տեղեկությունների` 4, կան նաեւ հարյուրավոր վիրավորներ:

«Ռոյթերսի» փոխանցմամբ` միջադեպի ականատեսները տեղեկացրել են, որ ցույցին մի քանի հազար մարդ է մասնակցել` բարեփոխումներ իրականացնելու պահանջով:

Սիրիայի պետական հեռուստաընկերության տվյալներով` ցույցեր եղել են երկու քաղաքում` Դերաայում եւ Բանյասում:

Հեռուստաընկերության տեղեկություններով` Դերաայում ցուցարարներին խառնվել են խռովություններ եւ բախումներ հրահրող մարդիկ, ինչի պատճառով էլ տեղի է ունեցել միջադեպը:

YouTube  կայքում հայտնվել են ցույցերի կադրերը, սակայն դեռեւս ճշտված չէ, արդյո՞ք դրանք համապատասխանում են իրականության: