Երիտասարդների բողոքի երթ

Հայաստանի երիտասարդական հիմնադրամի նախաձեռնությամբ` փետրվարի 28-ին` ժամը 12.30-ին, հիմնադրամի` Տերյան 74 հասցեում գտնվող գրասենյակին հարող տարածքից կազմակերպվեց բողոքի երթ դեպի ՄԱԿ-ի գրասենյակ` Սումգայիթյան ջարդերի օրվա կապակցությամբ:

1988-1990 թթ. Բաքվից 20 կիլոմետր հեռավորության վրա գտնվող Սումգայիթ քաղաքում ադրբեջանցիները ծրագրված կերպով իրականացրին հայ բնակչության կոտորածներ, ոչնչացրին հայերին պատկանող գույքը: Ավելի քան 200 բնակարան հարձակման ենթարկվեց, բազմաթիվ խանութներ ու արհեստանոցներ թալանվեցին, տասնյակ հազարավոր հայեր փախստական դարձան: Ջարդերն իրականացվեցին ադրբեջանական իշխանությունների գիտությամբ և համաձայնությամբ, դրանց նախորդել էին հակահայկական քարոզչությունն ու ամբոխի անկարգությունները:

 
Սումգայիթի ցեղասպանության փաստի քողարկումը և միջազգային հանրության ներողամտությունը, այն չդատապարտելը նպաստեցին, որ մարդասպաններն ու նրանց ուղղորդողները խուսափեն արժանի պատժից, ինչը հանգեցրեց Ադրբեջանում իրադարձությունների հետագա վատթարացմանը. գագաթնակետը դարձան 1990 թվականի հունվարին Բաքվում տեղի ունեցած հայկական կոտորածները:

 
Շուրջ 10000 երիտասարդ Հայաստանում գործող 40 երիտասարդական կազմակերպություններից, այդ թվում` ՀՀԿ, ԲՀԿ, ՕԵԿ երիտասարդական կազմակերպություններից, ՀՅԴ «Նիկոլ Աղբալյան» ուսանողական միությունից, «Միասին» շարժումից, անկախ քաղաքական հայացքներից, հետաքրքրությունների շրջանակներից, միավորվելով Հայաստանի երիտասարդական հիմնադրամի նախաձեռնության շուրջ, փետրվարի 28-ին կայացած երթի միջոցով իրենց բողոքի ձայնը բարձրացրին ընդդեմ կատարվածի և հանուն ոճրագործության դատապարտման:

Երթին մասնակցող տասնյակ երիտասարդական կազմակերպություններն իրենց գործունեության ընթացքում առաջին անգամ նման համախմբվածությամբ հանդես եկան հայտարարությամբ, որով դատապարտում են 1988-ի փետրվարի 28-ին կատարվածը և պահանջում.

 
«Մենք` Հայաստանի երիտասարդներս, պահանջում ենք, որպեսզի միջազգային կազմակերպությունները, միջազգային հանրությունը դատապարտեն 1988-1990 թթ. հայերի դեմ իրականացված Ցեղասպանությունը և դրան տան քաղաքական գնահատական: Իրականացված Ցեղասպանության չդատապարտումը կծնի նոր Ցեղասպանություններ և այլ ռազմական հանցագործություններ, հատկապես, երբ Ադրբեջանն այսօր էլ չի հրաժարվել ռազմական հռետորաբանությունից և փնտրում է Ղարաբաղյան հիմնահարցի ռազմական ճանապարհով լուծման ուղիներ»:

 
Երիտասարդները 1988-1990 թթ. հայերի դեմ կատարված կոտորածները դատապարտող հայտարարությունը ուղարկեցին նաև ՀՀ-ում հավատարմագրված բոլոր դեսպաններին. տեղեկացնում են Հայաստանի երիտասարդական հիմնադրամից: