Հայաստանը հրաժարվել է, Ուկրաինան` ընդունել

Ուկրաինայի բռնցքամարտի ֆեդերացիան ցանկություն է հայտնել ընդունել օգոստոսին նախատեսված` Եվրոպայի երիտասարդական առաջնությունը։ Այն պլանավորում էին անցկացնել Երևանում, սակայն Հայաստանի բռնցքամարտի ֆեդերացիան հունվարին պաշտոնական նամակ էր ուղարկել EUBC-ին՝ հայտնելով, որ հրաժարվում է ընդունել Եվրոպայի առաջնությունը։

Հայկական կողմը նշել էր, որ օգոստոսին Երևանում կայանալու են համահայկական խաղերը, ինչը խոչընդոտում է Եվրոպայի առաջնության անցկացմանը, քանի որ Հայաստանի մայրաքաղաքում առկա հյուրանոցների քանակը չի բավարարում միաժամանակ երկու խոշոր միջոցառում կազմակերպելուն։

Առաջիկայում բռնցքամարտի եվրոպական ֆեդերացիան պաշտոնապես կհաստատի Ուկրաինայի հայտը։