ԼՂՀ արտգործնախարարը Կանադայում է

Փետրվարի 17-ին 7-օրյա այցով Կանադա է մեկնել ԼՂՀ արտգործնախարար Գեորգի Պետրոսյանը:

Ինչպես տեղեկացնում է «Հորիզոնը», փետրվարի 18-ին եւ 20-ին նա ելույթ է ունեցել Տորոնտոյում ու Մոնրեալում տեղի ունեցած ժողովրդային հավաքներում` նվիրված Արցախյան շարժմանը եւ Փետրվարյան հեղափոխությանը: Նախարարն ընդգծել է Հայաստան-Արցախ-Սփյուռք ազգային ուժերի համատեղման անհրաժեշտությունը Արցախյան հիմնահարցը բարեհաջող ավարտին հասցնելու գործում:

Տորոնտոյում ԼՂՀ արտգործնախարարը հանդիպումներ է ունեցել նաեւ ՀՅԴ, ՌԱԿ, ՍԴՀԿ ներկայացուցիչների հետ, բացի այդ` առանձին զրույց է եղել Կանադայի Հայ Դատի հանձնախմբի անդամների հետ: Նախարարը ներկայացրել է Ղարաբաղյան հիմնախնդրի կարգավորման բանակցությունների վերջին զարգացումները:

Արցախյան հիմնահարցն արծարծվել է նաեւ կանադացի պաշտոնյաների հետ հանդիպումների ընթացքում:

Փետրվարի 24-ին Գեորգի Պետրոսյանը Կանադայից կմեկնի Միացյալ Նահանգներ: