Փոխարժեքներ
02 10 2024
|
||
---|---|---|
USD | ⚊ | $ 387.18 |
EUR | ⚊ | € 428.45 |
RUB | ⚊ | ₽ 4.1 |
GBP | ⚊ | £ 514.06 |
GEL | ⚊ | ₾ 141.75 |
Հայաստանի բնակչության 57 տոկոսն ապրում է աղտոտված միջավայրում. վտանգված է ազգի գենոֆոնդը. այսօր լրագրողների հետ հանդիպման ժամանակ ասաց ՀՀ ԳԱԱ էկոլոգանոոսֆերայի հետազոտական կենտրոնի տնօրեն Արմեն Սաղաթելյանը:
Նա լրագրողների ուշադրությունը հրավիրեց հանրապետության հողերի աղտոտվածության վրա` նշելով, որ վերջին տարիներին ընթացող անկառավարելի գործընթացները հանգեցրել են դրանց` ծանր մետաղներով աղտոտմանը: Թույները հողից անցնում են գյուղմթերքին, ապա` մարդկանց, մինչդեռ երեխաների օրգանիզմը պատրաստ չէ դիմակայել դրանց: Արդյունքում` ապրում ենք առողջության համար վնասակար աղտոտված միջավայրում:
Ինչ վերաբերում է լուրերին, թե ՀՀ սահմաններից դուրս եկող ջուրը չի համապատասխանում միջազգային չափանիշներին, կենտրոնի տնօրենը հերքեց` ասելով, որ կենտրոնը ՆԱՏՕ-ի ծրագրի շրջանակներում 6 տարի շարունակ ուսումնասիրություններ է կատարել սահմանային կետերում` ստուգելով 40 ցուցանիշ. արդյունքը մեկն է` մեր սահմաններից դուրս եկող ջուրը համապատասխանում է միջազգային նորմերին:
Կենտրոնի լաբորատորիայի ղեկավար Լիլիթ Սահակյանը տեղեկացրեց, որ գյուղական շրջաններում դաշտերը ոռոգվում են լեռնահանքային արդյունաբերության արգասիքներով աղտոտված ջրերով: Հետազոտությունների ընթացքում հայտնաբերվել են մի շարք ծանր մետաղներ` սնդիկ, արսեն, կադմիում, որոնք առաջին վտանգավորության տարրեր են: Նրա խոսքով` մասնագետները առաջիկայում գնալու են Ախթալա, Ալավերդի եւ բնակիչներին պատմելու են արդյունքների մասին` առաջարկելով աճեցնել այնպիսի մշակաբույսեր, որոնք ավելի քիչ են կլանում ծանր մետաղները:
Ծանր մետաղներով աղտոտվածության դեմ պայքարը բավականին ծախսատար է, եւ խնդրի լուծման համար անհրաժեշտ են պետական աջակցություն եւ մեծ ռեսուրսներ: