Խոշոր ներդրումներ` Արցախում

Արցախում եւ Սյունիքի մարզում շարունակվելու են սլովակյան ընկերությունների ներդրումները. այսօր լրագրողներին հայտնեց Եվրոպայի հայկական միությունների ֆորումի նախագահ Աշոտ Գրիգորյանը: Ներդրումներ են կատարելու նաեւ չեխական ու ավստրիական ընկերություններ:

«Ընկերությունները, որոնք մեզ հետ Հայաստան այցելեցին, էներգետիկայի  ասպարեզում այնպիսի մեծ անուններ են, ինչպիսին է, օրինակ, ABB Slovakia-ն»,- ասաց Ա. Գրիգորյանը:

Գործարարներն այցելել են Սյունիք. մարզպետի եւ նրանց միջեւ պայմանագրեր են ստորագրվել մինչեւ 15-20 ՄՎտ հզորությամբ փոքր հիդրոկայաններ կառուցելու վերաբերյալ: Ընդհանուր առմամբ` Սյունիքում նախատեսվում է կառուցել ինը ՀԷԿ:

Գործարարներն այցելել են նաեւ Արցախ. այստեղ  հիդրոէլեկտրակայաններ կառուցելու համար նույնպես հսկայական ներդրումներ են կատարվելու:

ԼՂՀ արտգործանախարար Գեւորգի Պետրոսյանը գործարարներին հարցրել է, թե, արդյոք, չե՞ն վախենում Ադրբեջանի պիտակավորումներից եւ պատրա՞ստ են իսկապես ներդրումներ անել: Պատասխանել են, թե գիտեն` ուր են եկել եւ ինչ է պետք պատասխանել Ադրբեջանին` սադրանքների դեպքում:

Բացի այս` իրականացվելու են նաեւ բնակարանաշինական ծրագրեր. ամեն տարի 400-500 բնակարան է կառուցվելու Արցախում` «նոու հաու» տեխնոլոգիաներով: Դրա շնորհիվ հնարավոր է լինելու խնայել ջեռուցման ծախսերը: Ինչպես նշեց Ա. Գրիգորյանը, օրինակ, եթե դրսում -2 աստիճան ցուրտ լինի, ապա բնակարանը տաքացնելու կարիք չի լինի:

Բնակարանները վաճառվելու են մատչելի գներով: Սա նաեւ ռազմավարական ծրագիր է` ուղղված Արցախը վերաբնակեցնելուն: Նախատեսվում է, որ այդ բնակարանները լինելու են Բերձորում (նախկին` Լաչին):

Արցախում կառուցվելու է 15  փոքր ՀԷԿ: Շինարարական աշխատանքները սկսվելու են այս տարվա մայիսին:

Ընդհանուր առմամբ` մոտ 25 միլիոն եվրոյի ներդրումներ են արվելու: