Ինչո՞ւ են մարդիկ ձայն տալիս իշխանականներին

Այսօր կայացած մամլո ասուլիսում «Սոցիոմետր» սոցիոլոգիական կենտրոնի նախագահ Ահարոն Ադիբեկյանը ներկայացրեց անցած տարվա հոկտեմբերին 1.650 մարդու շրջանում անցկացված սոցհարցման արդյունքները: Հարցվածներից 65 տոկոսի կարծիքով, այսօր մեր երկրում առավել ազդեցիկ է իշխանական թեւը: Ընդդիմությանը ազդեցիկ է համարել հարցվածների 8.3 տոկոսը: 26.7 տոկոսը դժվարացել է հարցին պատասխանել: Ազդեցիկության հիերարխիայում ամենաազդեցիկը համարել են երկրի նախագահին, ապա  Գագիկ Ծառուկյանին, Տիգրան Սարգսյանին, 4-րդ տեղում Լեւոն Տեր-Պետրոսյանն է, հետո Հովիկ Աբրահամյանը, ապա` Ռոբերտ Քոչարյանը:

Ազդեցիկների ցուցակում են նաեւ Արթուր Բաղդասարյանը, Րաֆֆի Հովհաննիսյանը, Վահան Հովհաննիսյանը, Սեյրան Օհանյանը: Չնայած հարցվածների 65.5 տոկոսը ազդեցիկ է համարում իշխանական թեւին, սակայն ընդամենը 35.5 տոկոսն է վստահում նրանց եւ հակառակը` ընդդիմությանը վստահողները 11.5  տոկոս են` նրանց ազդեցիկ համարած 8.3 տոկոսի փոխարեն:

Ահարոն Ադիբեկյանի կարծիքով, հետաքրքիրն այն է, որ մարդիկ ավելի շատ ձայն են տալիս իշխանականներին, քան ընդդիմությանը, որովհետեւ ուզում են հաղթել հաղթողների հետ: