Նախագահ Սերժ Սարգսյանը` Սյունիքի մարզում

Սերժ Սարգսյանն այցելել է Գորիսի հիմնանորոգված բժշկական կենտրոն, որը մարզային հիվանդանոցային համակարգի արդիականացման ծրագրի շրջանակներում հագեցվել է նաեւ բժշկական ժամանակակից սարքավորումներով ու գույքով: Կենտրոնում աշխատանքներ են իրականացվել ղեկավար անձնակազմի վերապատրաստման, հիվանդանոցի կառավարման ժամանակակից սկզբունքների եւ համակարգերի ներդրման ուղղությամբ: Համաշխարհային բանկի վարկային ծրագրով այս բուժհաստատությունում ընդհանուր ներդրումները կազմել են մոտ 3 մլն դոլար:

2009թ. դեկտեմբերից մինչ այժմ արդիականացման աշխատանքներ են իրականացվել եւս չորս մարզային` Հրազդանի, Իջեւանի, Արմավիրի, Արարատի  բժշկական կենտրոններում` նպատակ ունենալով նպաստել հիվանդանոցային բուժօգնության մատչելիության աճին` տեղում բարձրորակ բժշկական ծառայությունների մատուցմամբ նվազեցնելով մարզերից Երեւան հիվանդների հոսքը:

Գորիսի բժշկական կենտրոնում Հանրապետության ղեկավարը ծանոթացել է իրականացված աշխատանքին եւ դրա արդյունքում բուժհաստատությունում ստեղծված պայմաններին, օպտիմալացման ու ներդրումային ծրագրերին:

Սյունիքի մարզ կատարած աշխատանքային այցի շրջանակներում նախագահ Սերժ Սարգսյանը կայցելի նաեւ «Լեռ-Էքս» ՍՊԸ-ի հանքաքարի վերամշակման հարստացուցիչ ֆաբրիկա: